Kerido kompatriota, 

E pandemia di ‘Corona’ un bes mas a gòlpia nos ku forsa e aña akí, ounke di forma distinto. Desafortunadamente, hopi di nos tin di paga un preis haltu pa esaki. Pa hopi empresario a resultá difísil mantené nan negoshi habrí a pesar di e sosten ku gobièrnu a bin ta duna. Empleadonan regularmente a haña nan ta risibí ménos entrada pa asina entre otro por baha gastu di gobièrnu i di empresanan. Muchanan ku ta bai skol a pèrdè basta lès, miéntras ku nos studiantenan tambe a haña nan ta keda pa largu tempu nan so den nan kamber leu fo’i kas.  Pa no papia mes di nos sektor di kuido ku te ainda ta bou di basta preshon. 

Sinembargo, durante e aña akí ku ta serka di kaba, nos a deskubrí formanan nobo pa uni a pesar ku e pandemia a tene nos mas separá di otro ku loke mi a deseá di mira. Esaki, brindando amor pa otro. Pasó amor a demostrá di por vense tur klase di kontratempu! Amor pa famia i amigu por salta kualke barera i salta kualke distansia. Dios grasia ku e teknologia di awendia tambe ta aportá hopi bon den situashonnan manera esaki. Di e forma akí nos a demostrá nos mes di ta kapabel pa huntu logra manehá e krísis akí, kuidando nos mes i kuidando otro. No solamente riba tereno di salubridat, pero tambe pa ku nos seguridat i bienestar. Esaki ta algu di apresiá, sigur awor na okashon di Pasku.

E desafionan ku Kòrsou ta enfrentando ta grandi; e abismo di pobresa a bira pió debí na e pandemia, tin hopi inseguridat riba merkado laboral, falta di invershon, eskases den sektor sosial, falta di kumplimentu den prestashon di servisio públiko i e deterioro di loke nos muchanan mester presta den enseñansa ta motibu di preokupashon. 

E gabinete ku na yüni a asumí e kargo, ku na kabes Promé Minister Pisas, tambe ta konsiente di tur e desaroyonan akí. Gobièrnu ta trahando enérgikamente pa implementá e akuerdonan ku a sera ku Hulanda den kuadro di e Pakete Pais, o sea, e Landspakket. Esaki ta algu ku nos tur por mira i konfirmá, i ta bon pa nos apresiá. E krísis di ‘Corona’ a mustra kuantu nos ta dependé di otro, no solamente nos komo pueblo di Kòrsou, sino tambe komo pais huntu den Reino, i asta komo parti di mundu. Nos a rekonosé esei i nos ta trahando duru na tur dos banda di oséano pa, mediante kooperashon denter di Reino, kombatí e krísis i krea un pais resiliente a traves di desaroyo i reforma. Respetá i konfia otro ta nifiká ku e dependensia ei ta un fortalesa kaminda por yega na e sosten nesesario. Esaki ta mustra un bes mas ku denter di Reino tin muchu mas di loke ta uni nos ku loke ta separá nos. 

E aña akí, nos isla a bolbe mustra generosidat i solidaridat. Vários kompatriota a komprometé nan mes desinteresadamente ku un bon kousa. Bunita ehèmpel di e kompromiso akí nos por a mira durante bishita resien di prinsesa Beatrix na Kòrsou. Ta trata aki por ehèmpel di: 

- Oscar, un yònkuman di 10 aña, ku spontáneamente a tuma e kurashi pa yuda salba bida di un flamingo ku despues a risibí e nòmber Oscar; 

- e esfuersonan kontinuo di organisashonnan kontra violensia doméstiko i abuso di mucha; 

- i tambe e inisiativa di residentenan lokal pa huntu krea un hòfi den bario ku awor ta produsiendo fruta i bèrdura fresku tur dia. 

Tur e ehèmpelnan akí, ni maske kon grandi òf chikí, ta kontribuí grandemente na e espíritu i nifikashon di Pasku. Ta ehèmpelnan ku ta pone mi sinti orguyoso komo boso gobernador i ta kosnan pa nos tur tambe tesorá. 

Nos libertat individual ta sigui limitá debí na e medidanan ku a tuma den e lucha kontra e vírùs di ‘Corona’ i ku obligatoriamente nos mester kumpli ku nan, kual tin be por tin konsekuensianan grandi pa nos. Awor ... na lugá di sufri, nos por disidí pa huntu aseptá i prosesá e limitashonnan akí! E ora ei e karga ta bira ménos pisá. Libertat tin su nifikashon esensial si huntu nos por eksperensi’é i us’é na bienestar di otro, en partikular na bienestar di henter komunidat di Kòrsou. Ta yega e dia ku nos lo por bolbe interaktuá manera kustumber ... ku welanan por karga nan ñetu riba skochi, ku nos por bai misa, Snoa, mòskei i tèmpel sin restrikshon, gosa huntu di un bunita espektákulo i evento deportivo i selebrá tur loke nos ke den libertat total. Hustamente e tempu akí di aña ta eksigí mashá di nos tur, pero mi ke pidi boso pa sigui perseverá. Mi ta spera aserka ku mi por konta ku boso tambe pa yuda redusí e vírùs na Kòrsou. Ta na interes di nos tur; tantu di e personanan enfermo òf frágil komo di e hendenan ku ta pèrkurá pa nan sernan kerí. 

Huntu nos ta warda yegada di e aña nobo, ku e speransa ku na 2022 i den futuro nos por bolbe brasa otro plenamente! 

Mi kasá Herman i ami ta deseá tur hende, unda ku bo por ta, i kual sea bo sirkunstansia personal, un felis Pasku! 

Manera semper, mi pensamentunan i kurason ta ku boso.