E palasio di Gobernador tin un funshon di bibienda i di trabou. Aki Gobernador ta risibí su bishitantenan i ta tene tambe enkuentronan seremonial. E último parti menshoná ta enserá huramentashon di ministernan nobo i di miembronan di kolegionan haltu di estado, pero por ehèmpel e seremonianan di naturalisashon tambe ta tuma lugá akinan.

E edifisio konosé un historia largu. Na 1634 hulandesnan, bou di mando di Johan van Walbeeck, a konkistá Kòrsou for di spañónan. E tempu ei tabata konsiderá Kòrsou un isla ubiká stratégikamente for di kua por a trata na kombatí e spañonan. Fuera di esei Kòrsou, pero tambe Bonaire tabata di gran importansia pa sakamentu di salu. E prioridat di mas haltu tabata konstrukshon di un fòrti pa medio di kua por a defendé Kòrsou. Boka di bahia di Santa Anna a resultá di ta un lugá apropiá i na e sitio akí, den sentro di siudat, a konstruí Fòrt Amsterdam kaminda despues, rondo di dje, a lanta Willemstad.

E palasio ta situá na e mésun lugá ku a konstruí e promé fòrti na 1635. Durante e siguiente dos añanan a agregá na esaki e promé kas di e representante di West-Indische Compagnie (WIC). E ‘predesesor’ di e palasio di Gobernador aki tabata un edifisio di palu ku tabata konsistí di dos piso. Mayoria di e material ku a sirbi pa su konstrukshon a bini for di Amsterdam.

Poko tempu despues a remplasá e edifisio di palu pa unu di piedra ku ta forma e núkleo di e palasio di awendia. Sinembargo estilo di e edifisio akí a kambia konsiderablemente durante siglonan. E parti mas bieu di e edifisio tabata konsistí di un paviyon parti dilanti. Pa medio di su largura a splet e paviyon den dos ala ku un pasashi sentral mèimèi. Poko despues di e promé konstrukshon akí a traha e di dos paviyon parti patras, ku un trapi monumental i dòbel su dilanti. Na 1765 a ekspandé e edifisio ku un galeria habrí na banda di haf. E edifisio a keda den e estado aki aproksimadamente shen aña sin ku a trese ningun kambio.

Durante 1868 pa 1870 a traha intensivamente na plannan di renovashon. Meta di tur e plannan aki tabata pa debolbé kara di e edifisio su dignidat i tambe pa krea mas espasio. Sinembargo, finalmente a limitá e renovashon na pegamentu di e galeria habrí na e edifisio prinsipal, na kambiamentu di e kamber di balkon proyektá den un asina yamá balkon kolgante i na ponementu di ornamentunan klásiko na e fachadanan dilanti i patras. Durante e proseso aki e estilo original i simpel di e parti patras di e edifisio a kai pèrdè.

E dak di e edifisio tambe tabata forma parti di e renovashonnan. A kita for di esaki e balkinan di soporte ku nan grasioso krelnan. Pero e renovashon aki tampoko no a hasi e palasio un edifisio duradero pa biba aden. Durante e periodo ku Gobernador Barge tabata na mando (1890-1901) a konsiderá un otro renovashon nesesario. Gobernador Barge i su famia a keda na lanthùis Ouintz, awendia lanthùis Groot Davelaar, durante e trabounan di renovashon. Aparentemente e renovashon di e tempu ei  tabata sufisientemente bon, pasobra ta te durante gobernashon di profesor Römer (1983-1990) a haña ku un restourashon grandi ta nesesario. Durante e periodo di renovashon di e palasio, Gobernador Römer a keda na lanthùis Santa Barbara.

Awor, ta  asuntu di konservá e palasio di Gobernador na Willemstad, ku ta un edifisio bieu i históriko, pa e futuru generashonnan. E sistema di konstrukshon, ku a apliká den siglo 17, usando koral batí komo base di semènt, ta nifiká ku murayanan di e palasio ta sufri di e asina yamá ’kanser di muraya’. E salu ku ta den e koralnan ta chupa asina tantu vògt ku na sierto partinan di e muraya fèrfmentu di muraya un bes pa aña kasi no ta sufisiente pa tene e esakinan limpi i rígido. Pues no ta nada staño ku kuido di e edifisio akí kasi tur dia ta tópiko di atenshon di Gabinete di Gobernador.