Kòrsou ta un isla multikultural, pues un pais kaminda ta biba hopi diferente nashonalidat. Pa hendenan di sierto nashonalidat ta eksigí un visa promé ku nan por biaha pa un teritorio Schengen. Gabinete di Gobernador por duna e visa akí na personanan ku tin un título di estadia bálido. Gabinete di Gobernador di Kòrsou por suministrá un visa pa teritorio Schengen tambe na no residentenan hulandes di Bonaire.

E asina yamá teritorio Schengen ta konsistí di diferente pais Europeo. Kua nan ta presis? Kontesta di e pregunta aki por haña riba e siguiente website: www.rijksoverheid.nl

Mester di un visa pa e teritorio di Schengen? Bo por konsultá esaki riba e siguiente website di Gobièrnu di Reino: www.rijksoverheid.nl

Kiko ta un visa?
Un visa ta un outorisashon òf desishon pa medio di kua bo por haña entrada na sierto pais. Si dunabo un visa, lo plak un sticker di visa den bo pasaporte. E visa ta indiká ku na momento di entrega di esaki no tin opheshon kontra di bo entrada sea si ta trata di un estadia temporal òf di unu di tránsito pa un terser pais. Sinembargo, un visa no ta duna un derecho irrevokabel di entrada. Tambe mester mustra na yegada di e biahe ku bo ta kumpli ku e kondishonnan di entrada.

Gabinete di Gobernador di Kòrsou ta trata petishonnan di visa pa biahenan ku destinu pa e teritorionan di Schengen kaminda Hulanda ta e destinashon prinsipal denter di Schengen. Si tin duda enkuanto e pregunta si mester di visa si òf nò, semper por tuma kontakto ku Gabinete di Gobernador di Kòrsou.

Gabinete di Gobernador di Kòrsou ta representá tambe un kantidat di otro paisnan di Schengen. Esaki ta nifiká tambe ku por pidi  un visa pa un biahe pa un di e paisnan aki serka Gabinete di Gobernador di Kòrsou. No tin mester di tin Hulanda komo desitinashon prinsipal.

E paisnan ku Kabinete di Gobernador di Kòrsou ta representá ta:

• Bèlgika
• Estonia
• Fransia
• Hungria
• Islandia
• Italia
• Lituania
• Luksemburgo
• Noruega
• Oustria
• Portugal
• Spaña
• Suesia

Kiko ta un visa di tránsito?
Posiblemente no ta bo intenshon pa biaha pa un di e paisnan di Schengen, pero bo mester yega e pais aki si via di un pais Schengen. Probablemente bo mester di un asina yamá visa di tránsito pa hasi e biahe aki. Si bo tin intenshon  di biaha via di un di e paisnan ariba menshoná pa un pais no-Schengen , bo por hasi e ora ei un petishon pa haña un visa di tránsito na Gabinete di Gobernador di Kòrsou. Si tin duda tokante e pregunta  si mester un visa si òf nò semper por tuma kontakto ku Gabinete di Gobernador di Kòrsou.

Petishon pa un Visa
Si bo ke hasi un petishon pa un Visa pa teritorio Schengen por pidibo pa mustra e siguiente dokumentonan:

• Formulario di petishon kompletamente yená. Por ‘download’ e formulario aki na hulandes, ingles, spañó, franses i chines akinan:
  
  - Formulario di petishon Nederlands
  
  - Formulario di petishon Engels
  
  - Formulario di petishon Spaans
  
  - Formulario di petishon Frans
  
  - Formulario di petishon Chinees
  

• Pasaporte bálido;
  
  
• Pasfoto resién saká  (1×);
  
  
• Pèrmit di estadia bálido;
  
  
• Deklarashon di dunadó di tabou;
  
  
• Slep di salario di e delaster 3 lunanan;
  
  
• Estado di kuenta bankario di e delaster 3 lunanan;
  
  
• Si ta aplikabel: un karta di invitashon (original) di un konosí òf miembro di famia di den e teritorio di Schengen:
  
  
• Si ta aplikabel: un kopia di e pasaporte di bo referente;
  
  
• Si ta aplikabel: slep di salario di e delaster luna di bo referente;
  
  
• Si ta aplikabel: reservashon di hotel;
  
  
• Si ta aplikabel ora ta hasi petishon pa un menor di edat: pèrmit di mayornan/tutor
  
  
• Si ta aplikabel ora ta hasi petishon pa un menor di edat: deklarashon original di skol.
  
  

E dokumentonan ku ta pidi pa por trata un petishon di visa, por ta diferente pa kada kaso i kada situashon. P’esei ta importante pa tuma kontakto promé ku e departamentu konsular di Gabinete di Gobernador di Kòrsou.

Na aña 2024 un visa Schengen ta kosta NAf 160,- na Gabinete di Gobernador.