For di 10 di òktober 2010 Kòrsou tin, meskos ku Aruba, Sint Maarten i Hulanda, e status di pais den Reino. Den kada un di e paisnan di e parti karibense di Reino, Rèi ta representá pa un Gobernador. Tambe Gobernador ta pará na kabes di gobernashon di Kòrsou. Ku esaki Gobernador ta e símbolo di union di Reino Hulandes. Pa ehekutá su tarea- i kompetensianan na un manera adekuá Gobernador tin un propio Gabinete na su disposishon.
 
Riba e website aki bo ta haña informashon tokante trabounan, responsabilidat- i  tareanan di Gobernador. Ta pone speech i otro notisianan importante tambe riba e website. A base di e informashon aki i e potrètnan ku ta aparesé, por haña un bista riba e trabounan di Gobernador. Tambe por akudí na e website aki pa haña informashon tokante Gabinete di Gobernador; en partikular tokante asuntunan konsular manera hañamentu di ‘Nederlanderschap’ i dunamentu di visa (Schengen) òf pasaporte (di emergensia)

Laatste nieuws

Diskurso di Gobernador di Kòrsou su Ekselensia Lucille George-Wout na Okashon di Dia di Rei 2022

Kerido kompatriotanan,

Awe nos ta selebrá aña di Rei. Nos rei Willem-Alexander ta kumpli 55 aña. Nos ta deseá e ku su famia un kumpleaño felis i un selebrashon ameno. E aña akí Dia di Rei ta den lus di konektividat, enlase, union efektivo ku otro. Ta un tema na su lugá, pasobra ku selebrashon di aña di Rei, tambe aki den nos parti di Reino, nos ta afirmá nos laso ku Kas Real. Pa mi ta un honor i un plaser di por dirigí palabra na boso tur akí en konekshon ku tal selebrashon. 

Ta parse ku e pandemia ku e último añanan tabatin mundu den su gara, awor na Kòrsou ta bou di kòntròl. Lamentablemente te ainda, ketu bai, nos ta sigui eksperensiá e konsekuensianan. E pandemia a sagudí nos fundeshi ekonómiko fuertemente i a trese den klaridat prinsipalmente e partinan débil, den sentido sosio-ekonómiko.  Sin embargo, konsekuensianan di e krísis lo tabata muchísimo pió, si nos no tabatin e laso ku Reino. 

Pa den futuro tambe ta eksistí e boluntat di sigui brinda nos apoyo den kuadro di Reino, pa nos por logra bini ariba bèk komo pais. E apoyo akí tin komo ophetivo, hasi ku Kòrsou ta resiliente; e ta ofresé nos pais e oportunidat ademas di realisá tan pronto posibel i riba nos propio forsa e outonomia atkirí; aktualmente ta debatiendo kon esaki mester sosodé. Ta un bon kousa; pasobra nos mester sigui skucha otro i sigui komuniká ku otro semper ku un ophetivo na mente: sirbi nos hendenan. Gobièrnu ta hañ’é dilanti di e tarea difísil di implementá e reformanan nesesario. Den e proseso akí ta inevitabel ku ta topa tropieso na kaminda. Mi speransa i ekspektativa pa boso, siudadanonan di Kòrsou ta, ku nos por mira huntu den direkshon di un futuro kolmá ku konfiansa. Ta di komprondé, ku komo representante di Rei i di gobièrnu di Reino mi no ta kompletamente ophetivo. Mi ta spera ku lo por pordoná mi esaki, prinsipalmente awe riba dia di Rei su aña. Pero ... na promé lugá ..., mi ta Yu di Kòrsou! 

Mi ta konvensí ku den nos pueblo ta eksistí e potensial di reforma. T’ei ta kaminda nos forsa ta sinta.  I sigur esaki ta e kaso tambe serka nos hendenan ku a skohe otro pais pa nan bai biba. Nos mester mobilisá e forsanan ei. Ta nesesario pa nos bolbe bira atraktivo pa nos siudadanonan, pa nan no tin nodi di sali bai buska un mihó bida otro kaminda; pero inkluso ku esnan ku ya ta biba afó, lo skohe hustamente pa nan bolbe nan patria.   

Esaki ta un bon momento tambe pa reflekshoná riba e hendenan ku semper ta komprometí ku nos sosiedat.  Ayera mi tabatin e plaser di otorgá na nòmber di Su Mahestat Rei, 23 kondekorashon real na kon-siudadanonan ku durante hopi aña a desplegá servisio i dedikashon na benefisio di nos komunidat. Mi ta bolbe felisitá e dekoradonan ku nan honorabel distinshon. 

Nos ta selebrá dia di Rei 2022 den solidaridat ku tur e siudadanonan di reino na Aruba, Boneiru, Saba, Statia, Sint Maarten i na Hulanda. Tambe na nòmber di mi esposo, Herman, mi ta proponé un bríndis pa salú di nos Mahestat Rei na okashon di su aña i pa tur e méritonan di nos dekoradonan.

 

Biba Rei!

Diskurso di Pasku di Nasementu Gobernador di Kòrsou Señora L.A. George-Wout 25 di Desèmber 2021

Kerido kompatriota, 

 

E pandemia di ‘Corona’ un bes mas a gòlpia nos ku forsa e aña akí, ounke di forma distinto. Desafortunadamente, hopi di nos tin di paga un preis haltu pa esaki. Pa hopi empresario a resultá difísil mantené nan negoshi habrí a pesar di e sosten ku gobièrnu a bin ta duna. Empleadonan regularmente a haña nan ta risibí ménos entrada pa asina entre otro por baha gastu di gobièrnu i di empresanan. Muchanan ku ta bai skol a pèrdè basta lès, miéntras ku nos studiantenan tambe a haña nan ta keda pa largu tempu nan so den nan kamber leu fo’i kas.  Pa no papia mes di nos sektor di kuido ku te ainda ta bou di basta preshon. 

 

Sinembargo, durante e aña akí ku ta serka di kaba, nos a deskubrí formanan nobo pa uni a pesar ku e pandemia a tene nos mas separá di otro ku loke mi a deseá di mira. Esaki, brindando amor pa otro. Pasó amor a demostrá di por vense tur klase di kontratempu! Amor pa famia i amigu por salta kualke barera i salta kualke distansia. Dios grasia ku e teknologia di awendia tambe ta aportá hopi bon den situashonnan manera esaki. Di e forma akí nos a demostrá nos mes di ta kapabel pa huntu logra manehá e krísis akí, kuidando nos mes i kuidando otro. No solamente riba tereno di salubridat, pero tambe pa ku nos seguridat i bienestar. Esaki ta algu di apresiá, sigur awor na okashon di Pasku.

 

E desafionan ku Kòrsou ta enfrentando ta grandi; e abismo di pobresa a bira pió debí na e pandemia, tin hopi inseguridat riba merkado laboral, falta di invershon, eskases den sektor sosial, falta di kumplimentu den prestashon di servisio públiko i e deterioro di loke nos muchanan mester presta den enseñansa ta motibu di preokupashon. 

 

E gabinete ku na yüni a asumí e kargo, ku na kabes Promé Minister Pisas, tambe ta konsiente di tur e desaroyonan akí. Gobièrnu ta trahando enérgikamente pa implementá e akuerdonan ku a sera ku Hulanda den kuadro di e Pakete Pais, o sea, e Landspakket. Esaki ta algu ku nos tur por mira i konfirmá, i ta bon pa nos apresiá. E krísis di ‘Corona’ a mustra kuantu nos ta dependé di otro, no solamente nos komo pueblo di Kòrsou, sino tambe komo pais huntu den Reino, i asta komo parti di mundu. Nos a rekonosé esei i nos ta trahando duru na tur dos banda di oséano pa, mediante kooperashon denter di Reino, kombatí e krísis i krea un pais resiliente a traves di desaroyo i reforma. Respetá i konfia otro ta nifiká ku e dependensia ei ta un fortalesa kaminda por yega na e sosten nesesario. Esaki ta mustra un bes mas ku denter di Reino tin muchu mas di loke ta uni nos ku loke ta separá nos. 

 

E aña akí, nos isla a bolbe mustra generosidat i solidaridat. Vários kompatriota a komprometé nan mes desinteresadamente ku un bon kousa. Bunita ehèmpel di e kompromiso akí nos por a mira durante bishita resien di prinsesa Beatrix na Kòrsou. Ta trata aki por ehèmpel di: 

 

- Oscar, un yònkuman di 10 aña, ku spontáneamente a tuma e kurashi pa yuda salba bida di un flamingo ku despues a risibí e nòmber Oscar; 

 

- e esfuersonan kontinuo di organisashonnan kontra violensia doméstiko i abuso di mucha; 

 

- i tambe e inisiativa di residentenan lokal pa huntu krea un hòfi den bario ku awor ta produsiendo fruta i bèrdura fresku tur dia. 

 

Tur e ehèmpelnan akí, ni maske kon grandi òf chikí, ta kontribuí grandemente na e espíritu i nifikashon di Pasku. Ta ehèmpelnan ku ta pone mi sinti orguyoso komo boso gobernador i ta kosnan pa nos tur tambe tesorá. 

 

Nos libertat individual ta sigui limitá debí na e medidanan ku a tuma den e lucha kontra e vírùs di ‘Corona’ i ku obligatoriamente nos mester kumpli ku nan, kual tin be por tin konsekuensianan grandi pa nos. Awor ... na lugá di sufri, nos por disidí pa huntu aseptá i prosesá e limitashonnan akí! E ora ei e karga ta bira ménos pisá. Libertat tin su nifikashon esensial si huntu nos por eksperensi’é i us’é na bienestar di otro, en partikular na bienestar di henter komunidat di Kòrsou. Ta yega e dia ku nos lo por bolbe interaktuá manera kustumber ... ku welanan por karga nan ñetu riba skochi, ku nos por bai misa, Snoa, mòskei i tèmpel sin restrikshon, gosa huntu di un bunita espektákulo i evento deportivo i selebrá tur loke nos ke den libertat total. Hustamente e tempu akí di aña ta eksigí mashá di nos tur, pero mi ke pidi boso pa sigui perseverá. Mi ta spera aserka ku mi por konta ku boso tambe pa yuda redusí e vírùs na Kòrsou. Ta na interes di nos tur; tantu di e personanan enfermo òf frágil komo di e hendenan ku ta pèrkurá pa nan sernan kerí. 

 

Huntu nos ta warda yegada di e aña nobo, ku e speransa ku na 2022 i den futuro nos por bolbe brasa otro plenamente! 

 

Mi kasá Herman i ami ta deseá tur hende, unda ku bo por ta, i kual sea bo sirkunstansia personal, un felis Pasku! 

 

Manera semper, mi pensamentunan i kurason ta ku boso.

 

.

De Gouverneur van Curaçao , mevrouw L.A. George-Wout, heeft hedenmiddag het eindverslag van de formatie met de formateur, de heer C.A. Peterson, besproken. De Gouverneur heeft kennis genomen van de bevindingen van de formateur met betrekking tot de vorming van een nieuw kabinet. Op donderdag 10 juni 2021 zal het eindverslag van de formatie worden besproken met de politieke leider van Movemento Futuro Korsou, de heer G. Pisas, en met de politieke leider van Partido Nashonal di Pueblo, mevrouw R. Larmonie. Naar aanleiding van dit gesprek wordt het moment van de beëdiging van het nieuwe kabinet bepaald.