Entrante 4 di novèmber 2013 a nombra señora Lucille Andrea George-Wout, riba rekomendashon di Konseho di Ministernan di Kòrsou i ku konsentimentu di Konseho di Ministernan di Reino, komo Gobernador di Kòrsou.

Señora George-Wout a nase 26 di febrüari 1950 na Kòrsou i ta kasá ku señor Herman S. George. El a hasi e estudio ‘Jeugd en Sociaal Cultureel Werker’ na nivel di HBO na e akademia sosial katóliko na Sittard i a traha na Kòrsou di 1971 te 1980 riba e tereno aki.

Seguidamente Señora George-Wout a okupá vários funshon polítiko. E tabata entre otro Diputado di Teritorio Insular di Kòrsou i Presidente di Staten di Antianan Hulandes. Durante su delaster funshon polítiko e tabata Minister di Relashonnan Interior, di Trabou i di Asuntunnan Sosial di Antianan Hulandes durante e di tres Kabinete Pourier.