Ta repartí kompetensianan di Gobernador den kompetensianan ku lèi ta preskribí komo Órgano di Reino (Reglamentu di Gobernador di Kòrsou) i den esunnan komo Órgano di Pais (Konstitushon Estatal).

Komo Órgano di Reino Gobernador mester protehá e interesnan general di Reino, sòru pa ehekushon di lèinan di Reino, Medidanan di Supervishon General di Gobièrnu di Reino i e tratadonan internashonal. Tambe E ta kontrolá si tá kumpli ku esakinan. Den kuadro di su kompetensianan siudadanonan tin prinsipalmente di haber ku ehekushon di e Lèi di Pasaporte (suministrashon di dokumentonan di biahe i di visa) i ehekushon di e Lèi di Estado enkuanto ‘Nederlanderschap’ (naturalisashon i opshon).

Ademas, banda di e funshonnan ariba mensoná, Gobernador ta representá tambe Rèi di Hulanda i konsekuentemente ta pará na kabes di gobernashon di pais Kòrsou. Den kuadro di e echo akí Gobernador ta gosa di inmunidat i ta ehekutá su kompetensianan bou di responsabilidat di ministernan di Kòrsou, ku na nan turno mester duna kuenta i rason na Parlamento di Kòrsou.

Tur aña Gobernador ta hasi apertura di Parlamento riba e di dos djamars di sèptèmber. Despues di un elekshon E ta dirigí e proseso di formashon pa yega na un gabinete. Pa esaki Gobernador ta nombra un formador. Tambe gobernador ta enkargá ku ratifikashon di lèi, dekretonan di lèi, nombramentu di un kantidat di dignatario manera ministernan, miembronan di Korte Komún di Hustisia i di Ministerio Públiko, tambe nombramentu  di Konseho di Asesoramentu, di Kontraloria General i di Banko Sentral di Kòrsou i  Sint Maarten. Tur aña Gobernador ta entregá durante e asina yamá ‘lintjesregen’ kondekorashonnan di Reino.

Finalmente Gobernador ta hunga un ròl den e proseso rondó di  otorgamentu di asistensia militar i di ekstradishon di detenidonan.