DISKURSO DI GOBERNADOR DI KÒRSOU

SU EKSELENSIA LUCILLE GEORGE-WOUT

NA OKASHON DI DIA DI REI 2020

Djaluna 27 di aprel, 20:00 or

Kerido ko-siudadanonan di Kòrsou, bon nochi.

Awe ta dia di Rei! Pero no manera nos a kustumbrá selebrá esaki na Kòrsou. E biaha akí no ku marshe liber gezellig den Punda, fiesta alegre riba kaya i aktuashon ku smak di nos artistanan. Nos tur mester a keda kas; i mas ainda, tene distansia un di otro. Normalmente esei no ta nos estilo di selebrá fiesta na Kòrsou. Pero e sirkunstansia ku nos tur, i rònt mundu, a bin haña nos aden debí na Corona-vírùs, no a laga nos ku otro opshon.

E fèrdrit i e agitashon ku e vírùs akí a trese pa mundu hinté, no ta imaginabel. Nos tur konosé e imágennan di otro pais kaminda trahadónan den kuido humanitario ta hasi tur loke ta na nan alkanse pa brinda e mihó atenshon posibel bou di e sirkunstansianan aktual, pero sin embargo hopi be kos ta sali fo’i man. Nos ta ‘biba’ ku tur e hendenan ku e vírùs a afektá, tur kaminda na mundu i tambe aki serka nos. Ya sea afektá den sentido físiko o afektá den nan bida diario.

E medidanan drástiko ku e gabinete akí a tuma ku gran diligensia tabata i ta nesesario. Esakinan ta evitá tantu posibel mas infekshon ku e vírùs. Afortunadamente, serka nos e strategia akí tabatin éksito den e periodo tras di lomba. Prinsipalmente komo gran mayoria di boso a sigui fielmente e instrukshon- i e konsehonan den e konteksto di ‘Keda Kas’, esta ... nos reglanan nobo di biba.

Pero nos tur huntu ta paga un preis haltu pa esaki. Ta inevitabel. Ekonomia ta stanká; bida sosial ta limitá i sektor kultural a empobresé. No ta posibel tampoko pa nos reuní i biba nos fe huntu, miéntras ta nèt na momentunan manera esaki ta loke mas nos ta sinti tantu nesesidat di hasi. No opstante ..., ta importante pa nos mantené speransa i konfiansa den futuro.

Pasobra ounke tin punto di lus den e lucha kontra e vírùs i den e kontròl di e kantidat di kasonan di enfermedat, nos sa tambe ku nos ta leu di a skapa di dje.

Nos mester tene debido kuenta ku e vírùs akí lo sigui ta presente durante basta tempu ainda tur kaminda na mundu; i ku esaki lo afektá nos bida di tur dia tambe pa basta tempu. Nos forma di ta huntu, traha huntu i dibertí huntu, lo ta suheto na restrikshon durante un tempu largu. Por lo pronto nos lo tin di biba asina kolektivamente, pa nos propio bienestar. Ke men ku nos lo mester haña un manera pa lidia ku e sirkunstansia akí. Mayoria di nos a logra bon den e periodo nos tras. Pero nos lo tin di wanta duru tambe durante e periodo nos dilanti.

Mi ta impreshoná pa e inisiativanan ku entretantu a surgi pa brinda apoyo na nos ko-siudadanonan na Kòrsou ku mas ta rekerí yudansa. For di Banko di Alimento te Krus Kòrá, i di personanan individual te empresarionan, hopi hende ta realmente komprometé pa huntu nos pasa e periodo difísil akí. Ta konmovedor.

Gobièrnu tambe ta hasiendo loke por denter di e posibilidatnan finansiero limitá di nos pais. Esaki ta sosodé a traves di e apoyo finansiero na siudadano- i empresanan; i a traves di apoyo sosial i konseho pa superá e periodo difísil akí.

Desafortunadamente, bou di e sirkunstansia sosio-ekonómiko den kua nos pais ta awor akí, e rekursonan no ta sufisiente pa nos por sigui biba na e nivel di kustumber. Nos lo mester rema ku e remanan ku nos tin, nabegá ku poko bientu. Ta asina ku hopi hende ya tabata luchando den kondishonnan sosio-ekonómiko prekario na nos pais. P’esei awor ta sumamente importante pa nos ta solidario ku otro. Lo pidi nos tur pa hasi sakrifisio pa asina krea e posibilidat ku nos tur ta surpasá e krísis akí di un forma digno. Esei ta inevitabel. Nos tur lo mester kontribuí na fortalesé nos sektor di kuido, rekobrá nos ekonomia i mantené nos servisionan sosial; ku poko palabra, kontribuí na logra ku bida por sigui dignamente den nos komunidat. Esaki ta nos realidat. Nos lo mester prepará nos pa un komienso nobo, un komienso diferente.

Afortunadamente nos no ta nos so na Kòrsou; i nos ta risibí sosten di Reino. Tambe den e krísis akí e paisnan den Reino ta sostené otro trahando huntu. Esei ta sosodé den kuadro di konsulta entre e kuater paisnan. I ounke komo pais outónomo nos lo tin di karga e krísis prinsipalmente nos mes, manera hopi otro pais na mundu tin di hasi den e periodo duru akí, nos por konta tambe ku asistensia di Hulanda den vários forma. Apesar ku Hulanda mes tambe ta gravemente afektá, tòg e ta ofresé yudansa riba tereno médiko, mediante oferta di fasilidat i medisina, kompromiso di personal médiko i tambe den otro forma di sosten, manera Defensa. E apoyo di likides ku Hulanda ta ofresé ta hasi posibel tambe ku gobièrnu di Kòrsou independientemente por tuma medida di yudansa pa siudadano- i empresanan. Pero ta di komprondé ku esaki ta pidi adaptashon di nos propio gastunan, tantu komo pais i famia, komo kada hende, e mes. Nos lo mester siña gasta sin lubidá mañan. Nos lo mester karga e gastunan huntu. E krísis akí ta pidi sakrifisio di nos tur.

No ta tur bataya kontra e krísis lo bai bon mesora. Nos lo tin di tene kuenta ku mas ahuste ta nesesario den e programa di servisio públiko aki na Kòrsou. I lo mester di pasenshi i perseveransia pa kos kana debidamente, di moda ku e yudansa ta yega na e lugánan korekto; serka e personanan ku efektivamente ta den mas nesesidat. Di importansia ta ku e ahustenan ta balansá, di moda ku henter pueblo huntu por karga i komprondé nan. Nos tur lo tin di aportá segun nos fortalesa pa haña solushon pa e retonan enorme den nos pais. Finalmente, ta kumbiní nos tur pa superá e krísis akí huntu. Aki, solidaridat ta e palabra klave.

Laga nos spera ku den e periodo nos dilanti nos lo por reanudá nos bida diario gradualmente atrobe. Esaki lo mester sosodé ku kuidou sí, pasobra nos ke evitá ku nos ta bai haña nos ku un brote na gran eskala na Kòrsou. Pero te hasta si e krísis médiko pasa mes, ainda nos lo tin di enfrentá retonan enorme. Niun hende no sa eksaktamente kuantu tempu mas e vírùs lo sigui raza mundu i finalmente kon grandi e daño na nos ekonomia i nos servisionan sosial lo ta. Mashá esfuerso ta nesesario pa huntu nos pone nos pais bèk riba pia. P’esei nos mesté di otro. P’esei nos ta un komunidat.

No opstante e konsternashon di e dianan akí, nos no por lubidá ku na okashon di Dia di Rei ta honra siudadanonan kende a traha di un forma komprometí pa nos sosiedat. E aña akí atrobe a galardoná un kantidat di kompatriota ku un kondekorashon real. E aña akí 22 persona na tur. Laga nan ta un fuente di inspirashon pa e aporte ku huntu nos ta duna pa superá Corona-vírùs.

(…)

Resientemente den un kòmbersashon na vidio mi por a felisitá nos Rei, Willem-Alexander, na nòmber di pueblo di Kòrsou ku motibu di su aña, e momentu ei e no a hasi aña ainda. Mi mester a bisa Rei ku lamentablemente nos lo no por selebrá su aña manera ta nos kustumber na Kòrsou. Su Mahestat a laga nos sa ku e ta biba intensamente ku e víktimanan di e krísis di Corona i ku e ta deseá gobièrnu di Kòrsou hopi sabiduria den e periodo difísil akí.

Na nòmber di Rei mi ta ekstendé saludo kordial na tur siudadano di Kòrsou, tambe di parti di Reina Máxima. Nan tin nos tur den pensamentu.

Ku nos fé komo un nashon bou di Dios, ban konfia ku pronto nos por selebrá e echo ku nos a libra di e krísis akí i ku mihó tempu lo bini pa kada un di nos.

Un bon anochi.